PAUNAK LEH A KHIAT NA
▪ Paunak te anuai abang in akhiat na kinei hi ▪
1
A si masa puan tuam tang.
A masa peuh hampha zaw.
2
Akta duh gawl kilawh khuh.
Huaiham lua leng gim na piang.
3
Akta mang kuan ki tutu.
Inkuan sung, khua sung, gam sung ah kilemna a om kei leh kiam sukna man’ than’ na piang hi.
4
Ak tui sungah a vom ding leh a kang ding kithei lo.
Mailam thu piang ding ki gen khol thei lo.
5
Buipi lei kei in zong khua ngai.
Kidawm in gam ta ding.
6
Bui a phak kuan a tawp.
Maban tun nailo pi a, lungkia a tawp.
7
Ciimnuai a sa kibak Geel tu ah kithuk.
Lungdam na mangngilh ngeilo khat vei teitei thek kik hamtang.
8
Deek lam tuktum gal suak.
Ih it pen zong gal suak thei.
9
Gallu kihta, gallu tuak.
Ut lo a ih pelh hangin a hak sa tuak veve.
10
Gal phawn’ kuan leh matut kuan.
Na khat peuh ih sepna ah ih zawh kuan ciangin hanciam semsem zaw.
11
Gip zong leh khuai zong.
Deih tuak kikhek.
12
Hakai pahtak lung vei.
A hoih dinga ih up khat peuh a gina lo a hong piang kikte.
13
Hausa sial mei let.
Nasep na ah a kimang sak te.
14
Hausa ziak in kuangzawn ban.
A hau a lian khat peuh vangin, a kiim a pam a te in noptuanna ngah.
15
Hawmsem nungta, nebum si baih.
Migi in cingh leng, nuntak nuam kingah a, huamham in ang sung bek gen leng, gentheih na kituak thei.
16
Inn gua hah lo, gam gua hah.
A u a nau, a khua a tui a puah lo a, midang apuah te.
17
Kam siam sial lei sang, kam siat sial liau.
Kam siam leng thisia zong mai khong thei, kam sia zang leng thu neu no khat peuh hang in zong liau thei.
18
Khai kha a gui agah.
Mi hoih lo te kigui zuih.
19
Kawl zong tuidam in kiho.
Zindo lengla do siam.
20
Kom Kiim zong ta pasal sagih neih sa nawkik.
Numeite tanu, tapa a kim in a neih hangin kisak theih ngam huai lo.
21
Kkhua pi guah zu satang hal.
Thu khat peuh a than’ veng vang hang a dai baih te.
22
Leiba leh sakha nuai nung.
Leiba nei te kisim mawh.
23
Lam nai tawn nuam behiang kum kua a tung lo.
A ngeina bang tawn loin, a baih bawl man in, hak sat na piang thei thu te.
24
Langbawm a ek ah awk.
Ih kidop kei leh eima gam tatna pan gimna kingah thei.
25
Leei leh ha zong ki pet.
Ih it ih ngaih pen te tawh zong kitawng kha thei.
26
Lusum zong bing tawng a zom.
Thu sia sa a hoih ding a lem pha.
27
Meima lo ah tho tu lo.
Thu khat peuh om masa loin, kigen ngei lo.
28
Meigong lung leh s azan ta.
Thu khual lo, heh baih, lung tom.
29
Mihing leh pa po.
Nuntak hun tom.
30
Mual mong mei khu zong nuam tuam.
Dahna, lungkhamna, haksatna ih tuah lei takin, ih gei a mi om mawk khat peuh nuamtuan sa in ki ngai hi.
31
Mui zang lua ki pei sat.
A kipil sak lua te in tuak khial baih.
32
Nadak kang in Kawl peh. Dai zang kang in Kawl peh.
Mun khat a thu (sia) piang in mun khempeuh lawh thei.
33
Ngal hapak sa tum kik ngei lo.
Pasal thu gen sa dok kik ngei lo.
34
A nu nung gal ban sat.
A lawm te zah in a hat loh hang in, lung kia loin sem tei tei a hih manin hamphat na ngaih veve.
35
Nu leh pa thumang a nah lawh pek.
A nu a pa thu mang te a kampha hi. (Lawh cing)
36
Nupa kilung tuak khua khat in zol o. Kkhkua khat kilung tuak khua kua in zol o.
Kilung tuak a ih kithu bup leh, kua mah in hong su sia zo lo.
37
Numei in a ma nawt, sumkuang in a lii khuat.
Eimam ai lam nuntakna ding pen ei mah ciat in ih han ciam kul hi.
38
Nahkia kawi in, nahkia mam suang.
Mi gina lo sung pan mi thupi khat peuh piang thei.
39
Pa that tokhom guan.
Thu khual in hehna thuk kik pah lo.
40
Pute leh lamsak kineh zo lo.
Ih pute ih simmawh nop hangin kizo ngei lo.
41
Sakhi a pi san a no san.
Ih nu ih pa te mah kisun ciat.
42
Sakhi in a tat nag kuam kua khual.
Mai lam gamtat nading kiguangkhuak, kigin’ kholhna nei.
43
Sakhi that lo nngaltang tum.
A neu nate zo masa lopi a, na lian pi a tumte.
44
Sial tat nunga sialdai kai.
A sia ding teng a siat khit ciangin ih puah kik hang phattuam na om lo.
45
Sial nuphal zong sihkuang ah kiliak.
Ih lawm ih gual luite, kimangngailh ngei lo ahih main ih kimuh kik cinagin nuam kisa.
46
Sial vom leh sial vom kingai.
Ei mah tawh a kibang mite kingai.
47
Simbeng zong kim citciat tangzang kiguang.
Pilna siamna kibang teng lak pan, makai ding khat kiguan kul.
48
Suangpi suangneu in thek.
A mah kia a a lian a hau thei om lo.
49
Tang a si kawl in kah.
A beisa hun a nopna dahna a hong phawk kik sak na (melmuh).
50
Tu nai lo khe khuang. Man nai lo tul sui.
A hih ding teng zo masa phot lopi a, a man khin sa bang a omte.
51
Thupha in kong biang kan lo, thusia in mual kua khum.
Thu hoih thupha tampi ih bawl hangin kuamah in thei lo, thusia neu no khat in mun khempeuh zel.
52
Va-al cinghkam sakhau taw ah kipua lo.
A tawntunga kikem kigal ging gige te’ tungah thu sia tung ngei lo hi.
53
Vai nunung guah sia in lap.
Sepna bawlna ah a thadah a, a tuantualte, haksatna khat peuh in lap.
54
Vaphual tangsa vapak tang.
A pil a siam mi hoih hi napi in ama kikep zawh loh man in mi gina lo a suakte.
55
Zawl thu kal ah sial thawl.
Zawl thu ah thu neu no khat peuh thu lian baih deuh.
56
Zawng’ neek ngau in thal pu.
Mi khat gamtat hoih lih na pen, midang bangmah thei lo khatin gum a na thual lawh khate.
57
Zawng in ama kheng mu loin a lawm te’ kheng ko.
Ama hoih lih nak imu loin a lawmte’ hoih lohna bek bek a koko te.
58
Zuau in a khap tawn.
Zuau thu ih gen leh hong kithei kik veve.